Á næstkomandi Oddastefnu, laugardaginn 20. maí, munu Friðrik Erlingsson, verkefnastjóri Oddafélagsins og Ágúst Sigurðsson formaður, kynna hugmyndavinnu og tillögu Basalt arkitektastofu að Sæmundarstofu.
Byggingin er hugsuð sem menningarmiðja héraðsins með fjölnotasölum fyrir almenning, veislu- og sýningarsal auk þess að vera miðstöð rannsókna og fræða í nafni Sæmundar Sigfússonar. Kirkjuskip byggingarinnar er glæsilega útfært og tekur mest um 400 manns í sæti, auk þess að vera tónleikasalur sem getur tekið á móti fullskipaðri sinfóníuhljómsveit.
Sæmundarstofa, miðstöð menningar og fræða í Odda, hefur verið markmið Oddafélagsins frá stofnun þess. Með tillögu Sigríðar Sigþórsdóttur er stórt og mikilvægt skref stigið í átt til þess að gera hugmyndina loks að veruleika, til heilla fyrir Rangárþing allt til framtíðar.
Oddafélagið vill hvetja íbúa Rangárþings til að koma á Oddastefnu í Hvolnum á Hvolsvelli, laugardaginn 20. maí milli 13.30 og 16.30 að kynna sér þessa tillögu og hlýða á aðrar kynningar af verkefnum Oddarannsóknarinnar.
