Oddi á Rangárvöllum – Þættir úr sögu höfuðbóls, í ritstjórn Kristborgar Þórsdóttur verður gefin út af Hinu Íslenska bókmenntafélagi.
Í ritinu eru 44 greinar eftir 22 höfunda og efninu er skipt upp í 17 kafla. Höfundar hafa ólíkan fræðilegan bakgrunn, sumir eru að stíga sín fyrstu skref á fræðasviðinu en aðrir hafa stundað rannsóknir í áratugi. Greinarnar eru sprottnar upp úr rannsóknum stjórnenda Oddarannsóknarinnar og nemendaverkefnum í tengslum við hana en margar greinar eru eftir aðra fræðimenn sem tengst hafa verkefninu á einhvern hátt, meðal annars með þátttöku á málþingum Oddafélagsins á rannsóknartímanum.
Í bókinni er miklum fróðleik um Odda og Oddaverja safnað saman á einn stað og efni bókarinnar er afar fjölbreytt. Varpað er ljósi á miðaldasamfélag á Íslandi, deilur um yfirráð kirkjustaða, helstu persónur og leikendur, einkum Oddaverja, menntir og bókmenningu, en líka umhverfi og efnahagslegar undirstöður höfuðbólsins í Odda.
Mikil áhersla er lögð á fjölbreytt myndefni og kemur það m.a. frá Árnastofnun á Íslandi og í Danmörku, Þjóðminjasafni og byggðasöfnum og frá fólki úr héraði. Blær Guðmundsdóttir sér um hönnun bókarinnar og umbrot. Þetta er vandaður og fagur prentgripur í harðspjalda kápu og til dæmis tilvalin sem útskriftargjöf eða stórafmælisgjöf.
Tilboðsverð í forsölu er aðeins kr. 5.900, en fullt verð er kr. 7.900.
Sendið nafn og netfang ásamt eintakafjölda sem óskað er eftir á netfangið: ritstjori@oddafelagid.is
Bók á ensku verður einnig gefin út um niðurstöður Oddarannsóknina, Medieval Oddi in Iceland as a Place of Power and Learning, í ritstjórn Helga Þorlákssonar, og verður gefin út af Brill útgáfunni í Englandi. Nánari upplýsingar um forsölu á henni verða birtar síðar.
