Óhætt er að segja að fyrir utan fyrirlesara á Oddastefnu, Helga Þorláksson, Kristborgu Þórsdóttur, Björn Bjarnason og Ólínu Kjerúlf Þorvarðardóttur, hafi Hafsteinn Þórólfsson og Björk Níelsdóttir, í hlutverkum Sæmundar fróða og Kölska, slegið hressilega í gegn með atriðum úr óperunni Sæmundur fróði eftir Þórunni Guðmundsdóttur, við undirleik Sólveigar Sigurðardóttur.
„Medieval Oddi in Iceland as a Place of Power and Learning,“ í ritstjórn Helga Þorlákssonar, kemur út síðar á árinu á vegum Brill útgáfunnar í Englandi, og bókin „Oddi á Rangárvöllum – Þættir úr sögu höfuðbóls,“ í ritstjórn Kristborgar Þórsdóttur er gefin út af Hinu Íslenska bókmenntafélagi.
Báðar bækurnar innihalda greinar eftir fjölda fræðimanna sem komu að sagnfræði-, bókmennta- og fornleifahluta Oddarannsóknarinnar síðastliðin fimm ár. Hér er nýju ljósi varpað á marga hluti sem áður voru huldir myrkri og getgátum. Bækurnar eru því hafsjór af nýjum fróðleik um sögu Odda og Oddaverja á miðöldum.
