Ungir bændur nytja fornfrægt höfuðból
![Bændurnir á Sólvöllum, þau Illugi Breki Albertsson og Hanna Valdís Guðjónsdóttir, heyja túnin í Odda og annast bústofn prestsins. Oddi sést á milli þeirra og ber kirkjustaðinn í Eyjafjallajökul.](https://i0.wp.com/www.visir.is/i/C98607D1A1FF7419691CBC4274E18A63791E2C1AD509EDCD12033B88E22ABAB3_713x0.jpg?w=696&ssl=1)
Sá siður að presturinn í Odda á Rangárvöllum sinni jafnframt búskapnum á þessu fornfræga höfuðbóli heyrir sögunni til. „Ég er bara með einn hund,“ segir sóknarpresturinn Elína Hrund Kristjánsdóttir.
Í þættinum Um land allt á Stöð 2 kynnumst við Odda.
„Starf prestsins hefur breyst. Okkar sauðir eru aðrir sauðir heldur en þeir sem þarf að heyja fyrir,“ segir Elína, sem samið hefur við unga nágrannabændur sína á Sólvöllum um að heyja túnin og annast fjárstofninn sem fylgir Odda.
![](https://i0.wp.com/www.visir.is/i/34BE1DEEE5BF88DCAFB9C811941E3AAD458C4C624600F75E32C63BD30F453E5A_713x0.jpg?w=696&ssl=1)
Sólvellir eru vestan Odda en þau Hanna Valdís Guðjónsdóttir og Illugi Breki Albertsson, bæði Rangæingar, keyptu jörðina í fyrra af frænda hennar og gerðust bændur. Á Sólvöllum búa þau með sauðfé og hross auk þess að annast búskapinn í Odda.
„Við hugsum um átján kindur fyrir prestinn. Og heyjum þá í staðinn ofan í þær og okkar í leiðinni,“ segir Hanna Valdís.
-En hvernig heyskaparjörð er Oddi?
„Hún er bara mjög fín. Sprettur vel á henni,“ svarar Illugi Breki.
![](https://i0.wp.com/www.visir.is/i/CDBFCD5393F626C6C17A6D4598F1FED06ABB29C7150660F7A0226084B27F948E_713x0.jpg?w=696&ssl=1)
-En fylgir því öðruvísi tilfinning að slá og heyja túnin í Odda heldur en önnur tún?
„Nei, það er nú bara eins,“ svarar hann.
-Þú hugsar ekki um: Hér var Snorri Sturluson og hér var Sæmundur fróði?
„Nei, ég hef nú aldrei pælt í því. En góð pæling.“
Í þættinum Um land allt lýsa forystumenn Oddafélagsins áformum um endurreisn staðarins sem menningar- og fræðaseturs. Við förum á Oddahátíð, ræðum við fræðimenn og heyrum af rannsókn, þar sem grafist er fyrir um upphaf ritmenningar Íslendinga með Sæmundi fróða og veldi Oddaverja, sem reis hæst á tíma Jóns Loftssonar.
Þátturinn er á dagskrá Stöðvar 2 á mánudagskvöld klukkan 19:10. Hér má sjá kynningarstiklu þáttarins: