Þórður í Skógum sæmdur fyrsta gullmerki Oddafélagsins

Stjórn Skógasafns hélt Þórði Tómassyni í Skógum afmælishóf í dag í tilefni af 100 ára afmæli hans þann 28. apríl. Þangað komu góðir gestir: forseti Íslands, Guðni Th. Jóhannesson; þjóðminjavörður, Margrét Hallgrímsdóttir; Þór Magnússon, fyrrverandi þjóðminjavörður og þrír stjórnarmenn úr Oddafélaginu, en Þórður hefur lengi verið heiðursfélagi Oddafélagsins.

Ingvar Pétur Guðbjörnsson, formaður stjórnar Skógasafns, bauð gesti velkomna og færði Þórði glæsilegt handmálað heiðursskjal frá stjórn safnsins eftir Þórhildi Jónsdóttur frá Lambey.

Ágúst Sigurðsson, formaður Oddafélagsins, flutti Þórði heillaóskir félagsmanna og sæmdi hann fyrsta gullmerki félagsins í heiðurs- og þakklætisskyni fyrir störf sín við söfnun, varðveislu og miðlun menningarminja. Merkinu fylgdi heiðursskjal, skrautritað af Vigdísi Guðjónsdóttur. Þar stendur:

Heill þér tíræðum

heiðursfélagi

Þórður Tómasson

í Skógum.

Í tilefni aldarafmælis þíns

og með þökk fyrir elju þína

við fræðistörf, ritstörf

og uppbyggingu Skógasafns

vill stjórn Oddafélagsins

sæma þig fyrsta gullmerki félagsins.

Lengi munu verk þín lifa með þjóð vorri.

Forseti Íslands fór fögrum orðum um Þórð og störf hans og þakkaði honum fyrir hönd íslensku þjóðarinnar. Margrét Hallgrímsdóttir, þjóðminjavörður, færði Þórði blómvönd frá forsætisráðherra og safninu veglega bókagjöf í tilefni af afmæli hans og kveðjur frá starfsfólki Þjóðminjasafns.

Í kaffisamsætinu minntist Þór Magnússon kynna sinna af Þórði og vináttu þeirra í gegnum árin og áratugina og afmælisbarnið þakkaði fyrir sig með glæsilegri ræðu þar sem hann rifjaði upp þegar hann fann köllun sína ungur að árum: að bjarga munum og minningum fortíðarinnar sem voru óðum að hverfa allt í kringum hann.

Þjóðin öll, en við Sunnlendingar sérstaklega, eigum Þórði í Skógum mikið að þakka og fögnum með honum á þessum merku tímamótum.