Sögusýningin „Sæmundur fróði og saga Odda 930-1305“ tekur smám saman að rísa úr jörðu. Nú í janúar komu starfsmenn Þjótanda á staðinn og lögðu gönguramp niður í Oddalund og settu jarðveg undir hringpallinn í miðjum lundinum, undir styrkri stjórn Þorsteins Jónssonar, sem sér um framkvæmdastjórn á þessu verkefni Oddafélagsins.
Þetta var mögulegt vegna þess að hjónin Ólafur Einarsson og Steinunn Birna Svavarsdóttir í Þjótanda vildu styrkja Oddafélagið í þessu verkefni og gerðu það með sóma og sann. Nágrannar Odda, ábúendur í Vindási, gáfu jafnframt efnið úr námu sinni til verksins. Báðum þessum aðilum þakkar Oddafélagið af hjarta fyrir rausn þeirra, velvild og drengskap.
Næstu framkvæmdir eru að leggja mottur á göngurampinn og ganga frá hringsvæðinu. Vinnsla ljósmyndanna gengur hægt en örugglega, enda starfið flókið og tímafrekt. Hönnun og undirbúningur fyrir skiltaborgina sjálfa er á byrjunarstigi, en skiltaborgin samanstendur af níu skiltum þar sem sögu Odda frá upphafi og fram um 1300 verður gerð skil, með ljósmyndum af helstu persónum í sögu Odda.
Svona verkefni skiptist upp í mörg smærri verkefni og atriði sem öll verða að falla vel hvert að öðru svo allt gangi upp, og þar spila fjármunir jafnan stærsta hlutverkið. En margir eru tilbúnir að leggja Oddafélaginu lið, eins og Ólafur og Steinunn Birna í Þjótanda og nágrannar okkar í Vindási, til þess að vekja úr mold hina sögustóru fold, eins og séra Matthías Jochumsson orðaði það í kvæði sínu Á Gammabrekku, sem hann orti þegar hann var prestur í Odda.
Vonandi tekst okkur að láta draum Matthíasar rætast, svo gestir og gangandi geti til allrar framtíðar komið í Odda og kynnt sér sögu staðarins og helstu persónur af ætt Oddaverja.
Hér má sjá nokkrar ljósmyndir úr sögusýningunni á vinnslustigi. Ljósmyndir og myndvinnsla: Brynjar Ágústsson. Öll réttindi: Oddafélagið. Ekki er leyfilegt að afrita þessar myndir af síðunni. Allar upplýsingar veitir verkefnastjóri Oddafélagsins, Friðrik Erlingsson. Netfang: ritstjori@oddafelagid.is
